Laugavegshlaupið fer fram 13. júlí 2024

Skráningarfyrirkomulagið fyrir árið 2024 verður eins og árið 2023. Skráningin opnar þann 1. nóvember og verður opin í viku, eða til 8. nóvember. Þátttökuskilyrðin eru 370 ITRA stig. Ef eftirspurn verður meiri en framboð af sætum í hlaupið, verður dregið úr skráðum þátttakendum. Hlauparar geta fengið ITRA stig með því að taka þátt í utanvegahlaupum sem eru viðurkennd af ITRA samtökunum (International Trail Running Association).

• 1. nóvember kl. 12:00 - Skráning opnar í Laugavegshlaupið 2024 
• 8. nóvember kl. 00:00 - Skráning lokar í Laugavegshlaupið 2024 
• 15. nóvember kl. 12:00 - Tilkynnt verður hverjir komust í Laugavegshlaupið 2024 
• 15. - 22. nóvember - Endurgreiðslur til þeirra sem fengu ekki miða.  
• 30. desember - Síðasti dagur 75% endurgreiðslu. 
• 1. mars - Síðasti dagur 50% endurgreiðslu. 
• 10. Maí – síðasti dagur sem tekið verður inn af biðlista. 
• 12. maí - síðasti dagur til að breyta áætluðum lokatíma. 
• 13. júlí - Hlaupið fer fram! 

Skráning

Skráning opnar í hádeginu miðvikudaginn 1. nóvember 2023 og er opin í viku til 8. nóvember.

Skilyrðin til að taka þátt í Laugavegshlaupinu 2024 eru 370 ITRA stig.

Mikilvægt er að allar upplýsingar um ITRA stigin í umsókninni komi skýrt fram og séu rétt.

Úthlutunin:

• Stigahæstu ITRA stigs hlauparar karla, kvenna og kvára fá fyrstu úthlutun.
• Lottó: Skráningar fyrir hlaupara með 370 ITRA stig eða fleiri.

Greiðsla á þátttökugjaldi 

Greitt er fyrir þátttöku með greiðslukorti. Þeir hlauparar sem fá ekki úthlutað skráningu 15. nóvember og fara á biðlista fá endurgreitt á kortið sitt fyrir 22. nóvember.
* ÍBR tekur 12.750 kr umsýslugjald við vinnslu umsóknar þeirra sem komast inn í hlaupið, þetta er hluti af skráningargjaldinu. Þessi hluti gjaldsins er ekki endurgreiðanlegur (fyrir þau sem komast inn í hlaupið).

Úrvinnsla umsókna 

Að umsóknarfresti liðnum fer starfsfólk ÍBR yfir ITRA stig hlaupara með því að keyra saman gagnagrunn ITRA og skráningarkerfi Laugavegshlaupsins. Ákveðinn fjöldi sæta í hlaupið fer til stigahæstu hlauparanna.

Þátttökuskilyrðin fyrir skráningu í Laugavegshlaupið 2024 eru 370 ITRA stig. Mikilvægt er að öll skoði vel ITRA stigin sín og skrifi þau rétt inn í skráningarkerfið. Ef eftirspurn er meiri en framboð af sætum í hlaupið verður biðlisti fyrir þau sem komast ekki inn úr lottóinu. Allar gildar umsóknir fá slembitölu. Úthlutun slembitalna á umsóknum er framkvæmd af starfsmanni ÍBR og fulltrúa frá langhlaupanefnd FRÍ. Slembitölurnar ráða því hvar í röð umsókn lendir. Hægt verður að nálgast biðlistann á heimasíðu hlaupsins.

Áætlað er að hlauparar fá tilkynningu um niðurstöðu umsóknar fimmtudaginn 15. nóvember 2023.

Ef umsækjandi hyggst ekki nýta skráninguna sem hann hefur fengið úthlutað og greitt, skal hann láta ÍBR vita með því að senda póst á info@marathon.is. Ekki er hægt að breyta skráningu úr einu nafni yfir á annað, né færa skráninguna yfir á næsta ár.

ATHUGIÐ

• Fyrir 30. desember fá hlauparar 75% endurgreitt
• Fyrir 1. mars fá hlauparar 50% endurgreitt
• Engin endurgreiðsla er við afskráningu eftir 1. mars

Góðgerðarskráning

Boðið verður upp á góðgerðarskráningar, þar sem stór hluti þátttökugjaldsins fer til góðgerðarmála sem hlaupari getur valið í skráningarferlinu.

Opnað verður fyrir góðgerðarskráningu 1. desember kl. 12:00 og verður hún opin meðan laus sæti eru í boði. Fyrst koma fyrst fá, en verða öll sem skrá sig verða að vera með a.m.k. 370 ITRA stig.

Þriðjaskiptareglan

Hafi hlaupari ekki fengið úthlutað skráningu tvö ár í röð fær hann örugga skráningu í þriðja skiptið sem hann sækir um. Þessi regla tekur fyrst gildi fyrir umsóknir um hlaupið 2022 og verður hlaupari að sækja um árlega og hafa ITRA stigin sem þarf.

ITRA

ITRA eru alþjóleg samtök utanvegahlaupara, stofnuð 2013. Hlutverk þeirra er að vera bæði hlaupurum og hlaupahöldurum innan handar varðandi allt sem við kemur utanvegahlaupum. ITRA er tæknilegur ráðgjafi Alþjóða Frjálsíþróttasambandsins varðandi utanvegahlaup og er til dæmis Frjálsíþróttasamband Íslands aðili að samtökunum og Íþróttabandalag Reykjavíkur. ITRA gæðametur utanvegahlaup út frá vegalend og samanlagðri hækkun ásamt því að birta úrslit úr utanvegahlaupum.

Það eru fjölmörg utanvegahlaup á Íslandi og erlendis skráð hjá ITRA og þeim fer fjölgandi. Hægt er að skoða þessi hlaup á heimasíðu ITRA undir flipanum "races". Heimasíða ITRA er: www.itra.run

Stigakerfi ITRA

ITRA gefur hlaupara stig eftir því hversu hratt hann fer viðkomandi hlaupaleið, frá 0 til 999. Þeir hröðustu fá hæðsta stigaskorið o.s.frv. Það eru um 2000 íslenskir utanvegahlauparar í gagnagrunni ITRA og meðaltal íslenskra hlaupara eru 466 stig, sjá mynd hér fyrir neðan. Ef þú hefur tekið þátt í utanvegahlaupum síðustu ár eru mjög miklar líkur á að þú sért nú þegar í gagnagrunninum og sért skráð/ur með stig.  Stig eru reiknuð sem meðaltal besta árangurs í utanvegahlaupum síðastliðin 3 ár. Ef þú hljópst t.d. Laugaveginn 2020 þá ertu með stig fyrir þann árangur. Önnur utanvegahlaup síðastliðin 3 ár (36 mánuði) gefa þér einnig stig, eins lengi og þau hafa verið gæðametin af ITRA.