Farangur - Bláfjallakvísl taskan:
(Skilinn eftir við afhendingu gagna á fimmtudag eða föstudag)
Þátttakendur geta skilið eftir tösku við afhendingu gagna. Þessum farangri verður komið fyrir á syðri árbakka Bláfjallakvíslar. Í töskunni geta t.d. verið skór, fatnaður og orka. Alls ekki gler eða gosdósir. Þau sem eru að hugsa um að skipta um föt og skó á miðri leið geta nýtt sér þennan möguleika.
ATH: ÞESSAR TÖSKUR VERÐA FLUTTAR BEINT TIL REYKJAVÍKUR AÐ HLAUPI LOKNU OG FARA EKKI Í ÞÓRSMÖRK. Ekki er borin ábyrgð á farangrinum og ættu því engin verðmæti að vera í innihaldi hans. Ekki sími, vegabréf, peningar eða bíllyklar.
Til að þessi flutningur sé mögulegur fyrir þátttakendur þurfa allir að taka tillit til þunga og umfangs. Með gögnunum fylgir poki sem áætlaður er fyrir Bláfjallakvísltöskuna og við hvetjum fólk eindregið til að nota þann poka - ef ekki, þá sambærilegan að stærð. Of stórar töskur verða EKKI samþykktar. Hámarks þyngd hverrar tösku er 3 kg og umfang ca. 20x35 cm. Athugið að taskan kemur til með að standa úti og getur blotnað vegna veðurs á staðnum og/eða í flutningi og því gott að setja innihaldið í plastpoka og svo í töskuna.
Að hlaupinu loknu verða töskurnar fluttar til Reykjavíkur og eru þátttakendur vinsamlegast beðnir að sækja þær í Skautahöllina í Laugardal á eftirfarandi tímum:
- Laugardagskvöld um leið og rútur koma úr Húsadal
- Sunnudag frá kl. 12:00-14:00 (12. júlí)
- Mánudag frá kl. 9:00-16:00 (13. júlí)
Ósóttur farangur verður á skrifstofu ÍBR út vikuna, síðan verður farangri fargað.
Við afhendingu gagna fá þátttakendur farangursmiða sem festa þarf á tösku fyrir Bláfjallakvísl.
Farangur fyrir Húsadal
Í Landmannalaugum er hægt að setja farangur í rútur sem fluttur verður í Húsadal. Hver og einn þátttakandi þarf að að koma sínum farangri fyrir í rútunum. Starfsfólk verður til aðstoðar.
Mikilvægt er að hafa meðferðis hlý og þurr föt, töfflur og stórt handklæði. Athugið að ganga þarf frá búningstjaldi að sturtuaðstöðunni sem er utandyra. Farangurinn sem kemur með rútunum frá Landmannalaugum verður geymdur í tjöldum á marksvæðinu í Húsadal. Hlauparar eru beðnir að stilla farangri í hóf og merkja hann vel en engin ábyrgð er tekin á verðmætum í farangri.
Nauðsynlegt er að töskur sem hlauparar vilja hafa aðgang að í Þórsmörk séu merktar með farangursmiða sem þátttakendur fá við afhendingu gagna.
Mælt er með í hlaupinu:
Meðalhiti í júlí á Laugaveginum er um 7-8°C. Gera má ráð fyrir að brugðið geti til beggja vona með hitastig og veðurskilyrði. Af fenginni reynslu af veðri í Laugavegshlaupi er mikilvægt að vera vel búinn og fara eftir fyrirmælum skipuleggjanda varðandi klæðnað. Á 55 km leið í kulda og bleytu getur kæling orðið lífshættuleg.
Fatnaður fer eftir því hvernig viðrar þegar hlaupið fer fram. Allir þátttakendur þurfa að vera viðbúnir því við upphaf hlaups að klæðast eða taka með sér auka fatnað í hlaupið, verði þess krafist af skipuleggjendum. Hér er um að ræða síðerma peysu, vindjakka, síðar buxur, vettlinga, húfu sem nær yfir eyru og skjól fyrir háls.
Æskilegt er að hlaupaskór séu með grófum sóla og búið að hlaupa þá til þannig að ekki verði hætta á blöðrum. Vatnsvarðir skór eru taldir góðir en athugið þó að sumir þeirra halda vatni frekari inni í skónum en úti. Lágar legghlífar eru góðar til að hindra að snjór og möl komist ofan í skóna (sjá dæmi um slíka hlíf hér).
Nánari upplýsingar um útbúnað hlaupara má finna hér.
Töskurnar við Bláfjallakvísl eru flokkaðar eftir ráshópum og númerum. Þær þurfa að vera vatnsheldar því þær standa úti og geta blotnað vegna veðurs á staðnum og/eða í flutningi.
Sumir velja að skipta um skó eða annan fatnað við Bláfjallakvísl. Athugið að þar er engin önnur aðstaða en guðsgræn náttúran.
