Laugavegshlaupið er 55 km ofurhlaup sem á ensku nefnist Laugavegur Ultra Marathon. Ultra Marathon er samheiti á hlaupum sem eru lengri í kílómetrum en maraþon sem er 42,2 km.
Laugavegshlaupið er ekki fyrir gangandi þátttakendur en er ætlað reynslumiklum hlaupurum 18 ára og eldri sem eru í mjög góðri alhliða líkamlegri þjálfun og geta uppfyllt eftirfarandi skilyrði:
Ertu með 370 ITRA stig?
Þáttökuskilyrðin fyrir Laugavegshlaupið eru 370 ITRA stig. Hlauparar geta fengið ITRA stig með því að taka þátt í utanvegahlaupum sem eru viðurkennd af ITRA samtökunum (International Trail Running Association). Fjölmörg hlaup á Íslandi og um allan heim eru aðilar að þessum samtökum.
Ertu með góðan hlaupagrunn?
Nauðsynlegt er að hafa góðan hlaupagrunn og reynslu í að hlaupa langar vegalengdir utanvega, að lágmarki 30 km.
Tímamörk hlaupsins
Mikilvægt er að þátttakendur kynni sér tímatakmörk hlaupsins sem eru 4 klst út af drykkjarstöðinni við Álftavatn (22 km) og 6 klst og 30 mín út af drykkjarstöðinni í Emstrum (38 km).
Lokatími hlaupsins er 9 klukkustundir og 15 mínútur. Til að teljast hafa lokið hlaupinu þurfa þátttakendur að koma í mark innan þess tíma. Þátttakendur sem koma í mark eftir lokatímann fá ekki skráðan lokatíma og verða skráðir sem DNF (Did Not Finish) í úrslitum hlaupsins og hjá ITRA.
Þekkir þú kröfurnar um skyldubúnaðinn?
Samkvæmt reglum hlaupsins eiga allir þátttakendur að hafa með sér álteppi, flautu, vatnsheldan jakka, fjölnota drykkjarílát og síma. Áður en hlauparar leggja af stað mun starfsfólk hlaupsins ganga úr skugga um að allir þátttakendur hafi þennan skyldubúnað með sér. 60 mínútum er bætt við lokatíma þátttakanda ef skyldubúnað vantar.
Þekkir þú takmörkin þín?
Mikilvægt er að þekkja sín takmörk og vera með nægjanlegan andlegan styrk til að bjarga sér við erfiðar aðstæður.
Skipulag og undirbúningur
Í undirbúningi fyrir utanvegahlaup er mikilvægt að kynna sér mikilvægi viðeigandi fatnaðar og næringar.
Hefur þú kynnt þér reglurnar?
Nauðsynlegt er að allir þátttkendur kynni sér reglur hlaupsins og fari eftir þeim í einu og öllu.
Hefur þú kynnt þér skilmálana?
Við skráningu í hlaupið er nauðsynlegt að samþykkja skilmálana. Við mælum með að lesa þá vel yfir áður en skráning fer fram.
