Ráshópar 2026 verða tilkynntir í lok júní
Það er mikilvægt að allir þátttakendur gefi sig fram í viðeigandi ráshóp í upphafi hlaups. Eins þarf að passa upp á að fara í gegnum talningarhlið í Álftavatni og Emstrum. Þetta er nauðsynlegt vegna öryggistalningar.
Þátttakendum í Laugavegshlaupinu er raðað í ráshópa eftir ITRA stigum. Þátttakendur fá mismunandi lit á hlaupanúmerum, sem gefur til kynna í hvaða ráshóp viðkomandi er. Þeir þátttakendur sem skráðu sig saman í skráningarkerfinu raðast sjálfkrafa saman í ráshóp. Athugið, þar sem röðun ráshópa fer eftir ITRA stigum munu lægstu stigin ráða.
Hlaupurum er skipt upp í fimm hópa, eftir ITRA stigum: gulur, rauður, grænn, blár og bleikur. Litur á þátttökunúmerum segir til um hvaða hópi þátttakandi tilheyrir. Hlauparar eru ræstir í hollum með 5 mínútna milllibili og þarf röð þátttakenda í mark ekki endilega að endurspegla nákvæmlega röð þeirra í úrslitum. Klukkan í markinu sýnir tímann sem liðinn er frá því að fyrsti ráshópurinn hóf hlaupið.
Með þátttökunúmeri fylgja áfastir tveir farangursmiðar með sama númeri. Þeir eru ætlaðir til þess að rífa frá númerinu og merkja farangur. Sjá nánar um farangur hér.
Neðst á númerinu má finna hæðakort af leiðinni þar sem einnig kemur fram hvar drykkjarstöðvar eru staðsettar.
