Nauðsynlegur búnaður
5. júlí 2019

Helstu fregnir af Laugaveginum eru þær að leiðin er greiðfær og mun minni snjór en síðustu ár. Í kringum Hrafntinnusker er ekki samfelldur snjór, bara skellur víðsvegar í 4-5 km radíus, og því þurfa hlauparar að gera ráð fyrir að fara meira upp og niður gil þar í kring en undanfarin ár. Þar sem íslenskt veðurfar er ansi óútreiknanlegt biðjum við alla að undirbúa sig undir kulda og hafa tiltækan vetrarhlaupaklæðnað. Á miðvikudag fá þátttakendur senda ítarlega veðurspá fyrir hlaupaleiðina.


Nauðsynlegur búnaður

Á myndinni hér fyrir neðan má sjá hvaða búnað allir hlauparar ættu að hafa tiltækan á hlaupdag. Langerma bolur og síðar buxur, jakki, vettlingar og höfuðbúnaður sem hylur bæði höfuð og eyru er nauðsynlegur lágmarksbúnaður. Þá eru grófbotna skór og sokkar sem þola að blotna alltaf besti kosturinn. Reynslan hefur sýnt að hlaupurum þykir gott að nota lágar skóhlífar til að varna því að snjór og smásteinar fari ofan í skóna (sjá dæmi um slíka hlíf hér).

Mælum með að þeir sem þurfa að kaupa sér nýjan fatnað nýti sér 15% afslátt til Laugavegshlaupara á 66north.is. Afsláttarkóðinn er 66laugavegur.

Skyldu öryggisbúnaður

Til að auka öryggi hlaupara á leiðinni er skylt að taka með sér álteppi og flautu. Álteppið er til að halda á sér hita ef slys verður eða aðrir þættir sem leiða til þess að hlaupari þurfi að stoppa og bíða eftir aðstoð. Flauta er nauðsynleg fyrir hlaupara til að láta vita af sér ef hlaupari villist af leið, í þoku, eða óskar eftir aðstoð. Allir hlauparar fara í gegnum öryggishlið þar sem starfsmenn fara yfir öryggisbúnað í Landmannalaugum áður en lagt er af stað og einnig á leiðinni og í endamarki. Viðurlög við því að vera ekki með álteppi og flautu er 60 mínútur sem bætist við lokatíma hlaupara. Hægt verður að kaupa álteppi og flautir á kostnaðarverði við afhendingu gagna.

Taska í Bláfjallakvísl

Athugið að farangur sem flytja á að Bláfjallakvísl þarf að berast í Laugardalshöll fyrir kl. 17:00 föstudaginn 12.júlí (sjá opnunartíma afhendingar gagna hér). Ekki er tekið á móti farangri í plastpokum, eingöngu litlum töskum og er þyngd að hámarki 3 kg og stærð ca 20cm x 35 cm. Sjá nánar hér.

Upplýsingarit

Smellið hér til að finna upplýsingarit hlaupsins sem mikilvægt er að allir þátttakendur lesi, bæði þeir sem eru að hlaupa í fyrsta sinn og þeir sem hafa verið áður. Breytingar eru á milli ára varðandi öryggismál, tímatakmörk og fyrirkomulag á drykkjarstöðvum sem allir þurfa að vita um.

Á miðvikudag fá hlauparar ítarlega veðurspá fyrir hlaupaleiðina og einnig er von á fleiri póstum til að minna á mikilvæg atriði dagana fram að hlaupi. Skráðir þátttakendur eru því hvattnir til að fylgjast vel með tölvupóstinum sínum en allir upplýsingapóstar eru sendir frá netfanginu [email protected].

Nauðsynlegur búnaður

Deila þessari frétt
Samstarfsaðilar

Íþróttabandalag Reykjavíkur (ÍBR) var stofnað 1944 og eru samtök íþróttafélaganna í Reykjavík. Árlega hefur Íþróttabandalagið umsjón með fimm stórum íþróttaviðburðum: Laugavegshlaupið í júlí, Reykjavíkurmaraþon Íslandsbanka í ágúst, Miðnæturhlaup Suzuki í júní, Norðurljósahlaup Orkusölunnar í febrúar og Reykjavíkurleikar í janúar.